Hain ghar ki muhafiz meri dahaktii hui Ankhen
main taaq main rakh aaya hoon jalti hui Ankhen
ik pal bhi kisi mor pe rukne nahin detin
Kanton ki tarah jism main chubhatii hui Ankhen
raste main qadam phoonk ke rakhana mere pyaro
hain charon taraf shahar main bikhari hui Ankhen
Yun us ke bichar jaane pe ansoo na bahao
manzar ko taras jaayengii bheegi hui Ankhen
qaatil ke siva koi samajh hi nahin sakata
kya dekhati hain tasht main rakhi hui Ankhen
kya janiye kis Khawab ki tabiir main gum hain
zulfon ki ghani chaoon main uljhi hui Ankhen
‘Sagar‘ shab-e-tiiraa main ujalon ki amiin hain
nafrat ke samundar main ye bahati hui Ankhen.
No comments:
Post a Comment